旅行去唔少,但成家人一齊嘅就真係唔多
雖然我熱愛自由,討厭跟鴨仔團,但為免麻煩都破例地跟一次團...
比較過唔同旅行社嘅價錢同行程,是次選擇左星晨,尚算不過不失吧!
基本上間間旅行社都係搭韓亞航空,凌晨00:40 機,10點幾去到機場報到,諗住上機訓覺,但先後被唔同嘅小朋友團友騷擾,無覺好訓....唯有食個宵夜睇吓電影,本來見到個航機時間咁差誤會左韓亞係廉航,無咩期望,但原來係韓國第二大航空公司! 今次坐有兩層又好大架嘅A380,除左有唔少好戲睇,飛行餐都難得好食!
大約五點左右到達首爾,有少少時間兌錢同食個早餐,旅程第一餐就0係係麥記解決~
醫飽個肚就上車出發! 估唔到第一站竟然係賭場.......原因係兌錢抵de,仲有免費飲品...等等...
ok~跟得團就預左係咁,好彩有wifi可以打發一吓時間,杯免費咖啡都唔錯~
跟住再估唔到嘅就係下一站竟然係trick eye museum!! trick eye 係重點影相位,估唔到要以行屍走肉喪屍look 去.....zzz......
之前睇學生0係呢度影左好多過癮相,本來都有擔心過如果屋企人無興趣投入影就好無癮,但原來細佬係影帝!加埋佢手長腳長嘅身形,影左唔少靚相,ha~
呢個人做錯de 咩俾人鏟上天花板...?
張櫈好立體,但背景就一般啦,ha~
邊個篤我背脊?!
大人國與小人國...
呢張相證明搵個會提你穿崩嘅攝影師都係好重要的........
反地心吸力!
呢張幾正,ha
好唔落力救人嘅家人~XD
spiderman!
雖然三文魚壽司係好味,但都唔駛咁大舊啩!!
影嘅時候覺得呢張好真,但0係電腦睇覺得爭左啲...
有金執!! (X2)
除左3D畫,裡面仲有個好細嘅ice museum,雖然佢會俾件外套先入去,但件外套係零禦寒作用......所以捱左5分鐘左右就出左去lu...
睇完出嚟導遊介紹我地食呢款蛋餅,之前睇旅遊書都有介紹,的確唔錯!! ^^ 係此行第一樣美食~~
玩完一輪又到午餐時間,第一餐係食春川炒雞,味道唔錯!
食飽就出發去雪嶽山渡假村,因為位處郊區,車程都幾遠
途經梨泰院,落車行左陣,但無咩特別,仲要落雨...
臨上車買左個咖啡包,都係導遊推薦的,據說係馬來西亞華僑定居韓國後開的
個包又香又軟熟!^^ 如果唔係屋企人無咩興趣真係有衝動買多一個share...
食完包再繼續上路,又唔知搭左幾耐,終於到今晚住嘅雪嶽山渡假村~~
渡假村裡面有個水上樂園及溫泉,不過去到嘅時候落住唔細嘅雨,而水上樂園大部分都係戶外,所以都有de 掃興...不過嘅然一場嚟到,唔玩又無咩好做,結果都游左一陣水,細佬就浸左溫泉
房裡面有個懷舊電話 ^^
玩完又搭車去食晚餐~呢餐食韓式魷魚豚肉火鍋,導遊「話」韓國人唔係火鍋就係燒烤,叫我地有心理準備
雖然明知事實唔係咁,不過對團餐要求一向唔高,所以呢餐都仲覺得ok
除左主菜,幾乎餐餐都有好多配菜,好彩除左泡菜外都有de 係啱我口味的~呢餐有一大碗「豆腐腦」意外地好味!!難得食到咁原始嘅豆香味~
食完飯就見到餐廳外有架賣零食嘅貨車,但點解de poster 同賣嘅野咁唔match...
到達kimshi land,呢個係零興趣嘅景點...好怕聞到泡菜味,今次仲要我親手整泡菜,how come...
