close
御苑好大,而且見到咁多櫻花真係忍唔住影完又影~即使今次無野餐,純影相都比預期中影得耐咗,影完就起程去築地市場食晏
雖然我知道築地好多舖頭都早收,但又無認真睇係幾早,結果點幾鐘去到,大部分舖頭都已經收咗........- -"
好彩目標之一"松露玉子燒"未收,即刻買左舊嚟食,果然好鮮甜~
玉子燒都可以有好多味,可惜香港嚟嚟去去都係得原味...
由場外市場幾經辛苦行到去場內市場,原本想食嘅"大和壽司"亦唔例外地收咗,但隔離的"壽司大"仍然營業
見到條長龍,都嘗試排左陣,但見絲毫不動,就打退堂鼓,決定擇日再臨!
難得去到築地,無理由食塊玉子就走,結果求其揀左間未收的舖頭坐低食個丼,有海膽有帶子,yummy~~^^
填飽個肚就去東京駅,裡面有條零食街,街內有間卡樂B 專門店,除左有專賣的產品外,最大賣點就係有即炸薯條/薯片!!!! 食咗咁多年卡樂B,即炸嘅都係第一次,聽講之前係排晒長龍,但今次唔知係過咗熱潮,還是揀啱時間,唔駛排隊就買到~~
今次揀左薯條,真係好好味,瞬間消滅咗~
東京駅除左零食街,另一賣點就係卡通街,成條巷都係賣唔同卡通人物嘅產品,係好易大出血嘅地方
卡通人物當然唔少得日本國寶"宮崎峻'"嘅動畫,但每次都係當藝術品欣賞,睇完大多唔捨得買...
仲有小丸子
其中一間仲有賣tamagotchi,原來而家仲有得玩~曾經的確為它著迷,每日餵佢食野,做運動,掃屎,返學其間仲要交俾阿媽照顧...XD
tsum tsum 效應,而家好多卡通人物都以躺臥形態出現
每次見到蛋黃哥都忍唔住走埋去望吓,呢個case 真係好正,啲飯好有手感,但粒蛋實在太阻碇,好睇唔好用~XD
平時喺超市幾蚊一排嘅kitkat,估唔到喺日本會有專櫃售賣,即刻高級咗
靚到唔捨得食嘅布甸
行到攰,去左東京駅內嘅"茶寮都路里" 重拾京都嘅味道! 回想當年日元接近一兌十,喺京都食咗呢杯人生最貴嘅甜品 (接近$120),仲記得那種綠茶糕、綠茶雪糕、綠茶啫喱、白玉、紅豆等混雜而成的完美口感,今日以約6折價錢再嘗,仍覺好味!! 食完真係成口綠茶香~~可惜唔知係咪飲得太多杯麥茶,結果差唔多成晚訓唔著...
醫完肚順便去對面的丸之內大樓7樓平台欣賞東京駅的外觀,的確幾靚,可惜駅前正進行工程,影響景觀
影完相大約九點,唔想咁早返酒店,就去左新宿行陣
喺車站見到香蕉售賣機...130 yen 一隻都幾貴!
一出站就見到呢間旅遊書有介紹的"牛角包mix鯛魚燒",賣相都幾吸引,但呢刻太飽,諗住留返過幾日食,但結果都無食...
行吓機舖,見到部實體版tsum tsum 機,禮物當然就係tsum tsum 公仔啦~~
日本嘅夾公仔真係咩都可以夾,唔單止大大小小嘅公仔,連"尿袋"都可以夾! 左下角嘅布甸狗拖鞋實在太高難度,幾經艱難夾完一隻仲要諗點夾埋另一隻,仲要係同色...
全站熱搜
留言列表
